MK

Saturday, 22 April, 2017

友仔首次在單車徑踩單車

Filed under: Family — MK @ 18:58

garmin-connect-20170422

踩得好慢,係唔係?當然,因為呢次係友仔陪住我一齊踩嘛! 😍

友仔舊年踩平衡車就已經平衡得唔錯,但一直佢都唔肯試踩有腳踏嘅單車;直至星期一誤打誤撞,終於叫做可以放對腳上去腳踏度踩得到一小段距離。友爸友媽檢討以前唔成功嘅原因,可能係佢之前畀佢試踩嘅地方唔係大,佢好驚踩踩下就撞到嘢,所以諗住趁復活節假未完就帶佢去一次將軍澳嘅單車徑去試車。點知,我哋去到友仔揀嘅起點──康城站──時,個天落緊大雨!

18033845_10155104827930330_5140881757010184609_n

等咗好耐,見個天開始收雨,我哋諗住帶友仔出去踩,但友仔一直唔肯出去踩,又話「好攰」。我哋唔相信友仔講自己「好攰」,因為佢好多時都用呢個理由去推搪佢需要但唔想去做嘅嘢;我哋以為佢係驚會跌,因為佢成日話放對腳上腳踏度之後就話平衡唔到。

終於,帶到友仔出去單車徑,但個天又開始落雨,友仔就話要走,又喊住咁話「好攰」。因為我哋本來嘅目的地係調景嶺,咁落雨法我哋擔心友仔捱唔到,我哋諗住帶友仔回頭,打算由友媽帶友仔搭地鐵返屋企,而我就諗住藉呢次機會去坑口某單車舖檢查一下部單車,但友仔又再扭計,話要跟住我! 😣

我哋見由康城踩去坑口對友仔嚟講都幾遠,友媽諗住唔理友仔扭計,叫我自己去坑口,佢自己同友仔返屋企,但當時友仔就喊晒踩住架單車出嚟追番我,我哋冇計啦,由得友仔踩過來,睇下佢幾時知難而退。點知……

……唔止,仲一路越踩越興奮,同剛才喊晒口嗰陣判若兩人! 😱

友仔向來唔會直接講出心入面嘅感受;經我哋費煞思量,相信係友仔好驚濕! 🙄

結果,友仔一路踩到去坑口,仲要起碼有一半路程係踩住腳踏嘅!  😅

而我,本來下午有個約會,因為友仔堅持要跟住我而無法赴約。  😞

Create a free website or blog at WordPress.com.