明嘅，領展要將屋邨商場翻新，我應該覺得習以為常，但今次變嘅係我由細到大都喺度住嘅順利邨，點都會有啲唏噓。
聽講領展就快要同個商場大裝修。今日我嚟到，發現變咗嘅主要係冇咗幾間比較多人幫襯嘅食肆，有幾間舖變咗位置；似乎未有大變化，但當領展開始做嘢嘅時候，就唔知會變成點。
我臨走時，想喺仍然「健在」嘅舊快餐店或者茶餐廳食晏，但發現食一個午餐（一碟飯加杯嘢飲）竟然都要四十幾蚊，同九龍中部嘅差唔多！係唔係佢哋要收呢個價錢，先至可以畀得起貴租，而可以有得留低？
我唔想幫襯啲出面都有嘅連鎖店（佢哋賣嘅午餐價錢真係可以平啲），於是我落咗去街市。嗰度都變咗好多，有幾個檔口變咗賣熟食。我喺一間度食盅頭飯，加杯豆漿，廿六蚊。我覺得呢個先係住喺屋邨嘅人負擔得起嘅價錢。
順利商場卅幾年歷史喇，又唔係屋邨重建，唔駛大執㗎喎。領展想將佢變成點呢？
MK 