「長咀」、「短咀」,無論係個名同地理位置,畀人嘅感覺都係長咀威過短咀。
不過,睇番自己個 blog,原來我自己已經去過長咀五次,有兩次仲要係露營添,但偏偏一次短咀都未去過;無他,旅行界前輩個個都話「短咀難去過長咀㗎」;呢句話,令我以為自己唔會有機會去短咀。估唔到,朋友M計劃喺佢要去天涯海角另一處之前行晒佢心目中喺香港有代表性嘅地方,其中一個係短咀!我梗係即刻約佢啦!就係咁,我哋兩個人就相約咗今日呢個咁好天氣嘅日子,遠征天涯海角。
近呢十年,香港嘅郊區越來越多人,尤以呢兩年疫情更甚,所以我哋一早就諗定要喺平日去行。即使係咁,今朝八點九左右已經有好多人排隊等九點三嗰班西灣村巴,我同M最終都係要打的入西灣亭起行。好在,入到西灣之後,都唔會太多人。
M細細個就已經跟旅行界前輩尋幽探秘,但原來佢有好多近年多人去嘅郊區打咭熱點都未去過,包括短咀,連西貢佢近十年都好少去,真係估佢唔到!我好過M一啲,一年幾前入過大浪灣,不過我今次都覺得西灣有啲唔同咗,除咗多咗個有機農莊,仲見到有啲荒地執靚咗,似乎畀人租嚟露營。
M因為好耐未行過大浪灣,由西灣至東灣佢都影咗唔少相;不過即使係年幾之前入過嚟嘅我,見到呢個令我愛上行山嘅香港後花園,點都會影番一兩張︰
喺東灣有一潭水,裏面有好多蝌蚪!
大浪四灣美景處處,但我哋今日嘅主要目標係短咀,所以我哋嗱嗱淋繼續前進。
大浪四灣有唔少人行山、露營、滑浪;過咗東灣之後,人少咗好多,不過都比起我印象中嘅平日多人。
呢張相嘅位置大概係前往長咀同短咀兩條路嘅交叉位。今次,我哋遠離身後嘅長咀,向短咀進發。
我哋喺沿途嘅山坡見到唔少一片片紅色點綴於翠綠嘅山坡之上;行近睇,似乎係漆樹嘅葉。
離開咗東灣一個鐘,我哋都只係行到沉船坑對上嘅澗位。我哋喺度大休食晏,洗個面先繼續上路。
前往短咀嘅路唔可以睇小,比起通往長咀嘅崎嶇,我哋行進得比較慢。
一點九左右,回望沉船灣同長咀︰
差唔多兩點,目標喺眼前喇(雖然仲有至少二百米直線距離)︰
喺呢個位影咗張 360 照片,雖然未到短咀,但景觀應該呢度最好。
剩番嗰幾百幾米路,上上落落,風化嚴重,路嘅兩邊都係直崖,睇落都幾驚險。
兩點三,終於到咗短咀!
好多人都話去短咀應該要落到最低睇吓舊將軍石,但我哋嚟到嘅時間比起預計遲咗一個鐘有多,況且落去嘅路都幾險要,我哋兩個嘅狀態唔算係好夠,我哋都只係影吓個將軍嘅頭殼頂,加埋對出嘅和尚洲同牛屎缽就算嘞🙈︰
只係得硬照係唔夠嘅,拍多齣片睇睇先︰
由於M要趕住返屋企,我哋都唔能夠留太耐,兩點半左右就回程。就算係原本計劃過嘅米粉咀、千溪海岸,我哋都放棄咗。即使係咁,我哋都唔係行得好快,因為大部份嘅路都要向上行,我哋雙腿其實作「老抽」㗎喇。
仲未離開短咀嘅山咀範圍,即係仲算係天涯海角嘅位置,牛牛都嚟得到食草。
遠眺黃茅洲︰
有人整咗前往米粉咀同短咀嘅過膠指示紙牌,仲要搵石磧住避免畀風吹走。
遠眺千溪海岸、高流灣、塔門、船灣︰
山坡上一片片嫣紅,除咗漆樹,仲有呢啲杜鵑︰
我哋沿住山脊經過米粉頂北面低少少嘅小徑,再次見到大浪四灣。M話︰「我哋返到文明喇!」
M咁樣講,係因為我哋唔駛再行啲我哋唔太熟悉嘅路;唔只,蚺蛇尖喺我哋嘅視線範圍,就即刻見多咗人。
哇,蚺蛇尖嘅路,我會形容為「粉碎」!近呢幾年太多人行喇!
出到大浪坳,五點鐘左右。真係返到文明喇。繼續經赤徑、土瓜坪行去黃石碼頭,六點四左右,總共行咗差唔多八個半鐘,有 23 公里。身體好攰,但可以同曾經一齊上山下海、玩過毅行者同山頭霸王嘅M一齊,喺佢預備搬去天涯海角另一處之前行一個我諗住呢世人都唔會有得去嘅天涯海角,心感滿足。